Volek ſyrolm thudothlon   ſy@@rolmol  ſepedyk . buol  oʒuk  epedek ··
Walaſth vylagum@@tul  ſydou  fyodumtul  eʒes urumētuul :
O en eſes urodū  eggen yg fyodum :
ſyrou a-@@niath thekunched  buabeleul kyniuhhad ;
Scemem kunuel arad  en iunhum buol farad / the werud hullothya  en iū-@@hum olelothya 
Vylag uila@@ga  viragnac uiraga . keſeru@@en . kynʒathul  uoſ ſcegegkel werethul :
Vh nequem 
en fyon eʒes meʒuul / Scege nul ſcepſegud  wirud hioll wyʒeul .
Syrolmom  fuha@@ʒatum therthetyk kyul  en iumhumnok bel bua  qui ſumha nym kyul hyul :
Wegh  halal  engumet / egge-@@dum illen / maraggun uro@@dum / kyth wylag felleyn 
O ygoʒ ſymeonnok beʒʒeg ſcouuo ere  en erʒem eʒ bu-@@thuruth / kyt niha egyre .
Tuled ualmun  de num ualallal / hul yg kynʒaſſal / Fyom halallal ·
Sydou 
myth theʒ turuentelen /
fyom merth hol byuntelen /
fugwa / huʒtuʒwa  wklel-@@ue / kethwe ulud .
Kegug@@getuk fyomnok / ne leg kegulm mogomnok / owog halal kynaal / anyath eʒes fyaal / egembelu ullyetuk .