Latiatuc feleym zumtuchel  mic vogmuc 
ýſa pur eſ chomuv uogmuc 
Menýi miloſtben terumteve eleve mív iſemucut  adamut 
eſ odutta vola neki paradiſumut hazóá 
Eſ mend paradiſumben uolov gimilcíctul munda nekí elnie 
Heon tilutoa wt ig fa gimilcetvl 
Ge mundoa nekí  meret nū eneýc 
ýsa kí nopun emdul oz gimilſ twl  halalnec halaláál holz 
Hadlaua choltat terumteve iſten tvl  ge feledeve 
Engede urdung intetvinec  eſ evec oz tiluvt gimilſtwl  es oz gimilſben halalut evec 
Eſ oz gimilſnec wl keſeruv uola vize  hug turchucat mige zocoztia vola 
Num heon muga nec  ge mend w foianec halalut evec 
Horoguvec iſten  eſ veteve wt ez muncaſ vilagbele 
eſ levn halalnec eſ puculnec feze  eſ mend w nemenec 
Kic ozvc
miv vogmuc 
Hug eſ tiv latiatuc ſzumtuchel  iſa eſ num igg ember mulchotia ez vermut 
yſa mend ozchuz iarov vogmuc 
Wimagguc uromc iſten kegilmet ez lelic ert  hug iorgoſſun w neki  eſ kegiggen  eſ bulſassa mend w bunet 
Eſ vimagguc ſzen achſcin mariat eſ bovdug michael archangelt eſ mend angelcut  hug uimaggonoc erette 
Eſ uimagguc ſzent peter urot  kinec odut  hotolm ovdonia eſ ketnie  hug ovga mend w bunet 
Eſ vimagguc  mend ſzentucut  hug legenec nekí ſeged uromc ſcine eleut  hug iſten ív uimadſaguc== ==mia bulſaſſa w bunet  Eſ zoboducha wt urdung ildetuitvl  eſ pucul kinzotviatwl 
eſ vezeſſe wt paradiſū nugulmabeli  eſ oggun neki munhi uruzagbele utot  eſ mend iovben rezet 
Eſ keaſſatuc uromchuz charmul  Kirl 
Scerelmeſ bratým  uimagg(om)uc ez ſcegin ember lilki ert  kit vr ez  nopun ez homuſ vilag timnucebelevl mente 
kinec ez nopun teſtet tumetívc  hug ur uvt kegilmehel abraam  ýſaac  iacob kebeleben helhezie 
hug  birſagnop ivtua mend w ſzentíí eſ unuttei cuzicun iov felevl  iochtotnia ilezie wt Eſ tiv bennetuc 
Clamate III.
K.